Во косовската полиција е пријавен уште еден случај на сексуално насилство врз малолетник.
Портпаролот на полицијата за Пеќ, Фадиљ Гаши, потврди дека во општина Исток е регистриран уште еден случај на силување на малолетно лице од возрасен маж, пренесува порталот kosovo-online.
Гаши најави дека инцидентот се случил на 9 август, но жртвата дури вчера го пријавила настанот во полиција. По пријавување на случајот, полицијата го привела осомничениот, кој по наредба на обвинител е задржан во притвор.
„Жртвата поради страв веднаш не го пријавила случајот. Инспекторите се занимаваат со случајот и на осомничениот му е одреден притвор до 48 часа“, рече Гаши.
Потсетуваме, пред 10-ина дена беше пријавен случај на силување на 11-годишно девојче во Приштина, што доведе до бран протести во Косово, но и во Албанија. Бројот на случаи на сексуално насилство во Косово е сè уште висок.
Само во првите седум месеци од годинава во косовската полиција биле пријавени 41 случај на силување.