Косовскиот премиер Хашим Тачи денеска најави дека Собранието на Косово ќе биде распуштено и дека гласањето по предлозите за формирање на Вооружените сили на Косово и за загарантираните места за малцинствата ќе остане за новиот собраниски состав.
– Парламент што не може да формира своја војска нема потреба ни да постои, рече Тачи на прес-конференцијата по средбата со еврокомесарот за проширување Штефан Филе во Приштина.
Тој изјави дека за формирање на Војската на Косово не се гласало заради „изборната грозница на неколку партии“.
Тачи најави дека денеска ќе се сретне со претседателката на Косово Атифете Јахјага и тогаш ќе се одлучи за вонредните избори.
– Го предложив 8. јуни како датум за оддржување на изборите и ние и натаму сме во рамки на роковите предвидени со Уставот на Косово, рече Тачи.
Актуелното Собрание на Косово денеска расправа за претходно предвидените точки од дневниот ред, а попладнево се очекува на дневен ред да се најде и можното распуштање на косовскиот Парламент.