Преку соопштение за јавноста, Светиот Архиерејски Собор на Српската Православна Црква, како што велат, повторно ја потсетуваат домашната и светска јавност на страдањата на Архиепископот охридски и Митрополит скопски г.г. Јован, Претстојателот на канонската Православна Црква во Р. Македонија, којшто по шести пат неправедно е затворен врз основа на нарачани лажни обвиненија и на монтираниот, фарса судски процес, како и на новите судско-полициски закани врз Архиереите, клириците и верниците на Охридската Архиепископија.
„Сите тие, на чело со својот Претстојател, се прогонети – како да не живеат во Европа на 21-от век и како да не постои начелото на слобода на верата и совеста, чијшто прв историски документ е Миланскиот Едикт на светиот цар Константин, а денес тоа го гарантираат обврзувачките меѓународни конвенции“, се вели во соопштението.
Соборот повторно апелира на сите луѓе и институции, кај нас и во светот, кои можат да придонесат за ослободување на Архиепископот Јован и за обезбедување на граѓанска рамноправност за сите припадници на Охридската Архиепископија, да го кренат својот глас и што поскоро да направат сè што можат, бидејќи здравјето на заробениот Архиепископ веќе сериозно е нарушено, во добар дел и заради затворските услови.