Словенечките угостители, на кои не им е дозволено да работат од октомври поради мерките против ширењето на коронавирусот, преку отворено писмо до Владата побараа брзо решение за зачувување на таа економска активност и најавија можност за отштетни побарувања против Владата. Кафеанџиите од земјата велат дека нивните загуби делумно се должат на нејасните регулативи за време на епидемијата.
Во писмото до премиерот Јанез Јанша и министерот за економија Здравко Почивалшек, угостителите предупредуваат на голем раст на невработеноста во овој сектор и бараат зголемување на надоместокот за плата на работниците во мирување до 100 проценти.
Тие ја повикуваат Владата да размисли за намалување на ДДВ-то на угостителските услуги, одложување на доспеаните кредитни обврски и други мерки што би му помогнале на угостителството подготвено да го дочека периодот по корона кризата.
Како што пренесува Хина, некои угостители најверојатно ќе покренат тужби против Владата поради нејасни регулативи во врска со работата во угостителството.