Косовскиот министер за внатрешни работи Скендер Хисени ги повика денеска земјите-членки на ЕУ да помогнат во спречување на масовното иселување на косовски граѓани.
– Земјите од ЕУ, како Австрија, треба колку може побрзо да ги вратат имигрантите од Косово. Постојано тврдат дека огромниот број илегални имигранти нема да добијат дозвола за престој и ќе бидат вратени. Очекувам тоа да се случи колку може побрзо, изјави Хисени на прес-конференција во Виена по средбата со австрискиот колега Јохана Микл-Лајтнер.
Двајцата министри изразија подготвеност за соработка по ова прашање.
Хисени истакна дека не сака „да се затвори границата на Косово однадвор“. Наместо тоа, тој ќе настојува Австрија и другите земји од Шенген зоната да ги укинат визите за косовските граѓани и да им дозволат легално да патуваат.
Најмалку 100.000 косовски граѓани ја напуштиле земјата од август до декември минатата година, а 50.000 од почетокот на оваа година.