Руската православна црква денеска изрази жалење поради одлуката на турскиот Државен совет за пренамена на досегашниот музеј Аја Софија во џамија.
Во соопштение, Руската православна црква истакна дека таквата одлука може да доведе до уште поголеми поделби. Според неофицијални извори на кои се повикуваат турските медиуми, првата молитва во џамијата најверојатно ќе се одржи на 15 јули, денот кога во 2016 година беше спречен обид за државен удар во Турција.
Аја Софија, изградена од Византија во 6-от век, со векови била најголемата христијанска црква во светот, а во џамија била претворена по османлиското освојување на Константинопол, денешен Истанбул, во 1453 година. Статусот од верски објект во музеј беше променет со указ во 1934 година од тогашниот турски претседател Мустафа Кемал Ататурк. Света Софија во 1985 година е прогласена за споменик на Светското културно наследство на УНЕСКО.