Бугарскиот премиер Бојко Борисов денеска имаше телефонски разговор со неговиот грчки колега Алексис Ципрас посветен на блокадите на границата меѓу Бугарија и Грција, предизвикани од протестот на грчките земјоделци, јави БТА.
Како што соопшти Прес-службата на бугарската Влада, Борисов во разговорот посочил дека на двете страни од границата чекаат речиси 1.800 камиони, кои трпат огромни загуби поради блокадите.
Борисов нагласил дека внатрешните проблеми на Грција не треба да бидат причина за ограничување на правото на слободно движење на луѓе и стоки и побарал на Ципрас Атина да преземе мерки за надминување на застојот, кои би можеле да вклучат и обезбедување коридор за транзитен превоз на стоки.