Генералниот секретар на НАТО Андерс Фог Расмусен денеска по разговорот со црногорскиот претседател Филип Вујановиќ, изјави дека Алијансата во иднина ја гледа Црна Гора како своја членка.
– Ние ја гледаме иднината на Црна Гора во евроатланското семејство и решени сме да и помогнеме на тој пат, истакна Расмусен.
Тој додаде дека Црна Гора е важен партнер за Алијансата и држава-кандидат за членство во НАТО.
Расмусен ги поздрави постојаните напори за придружување на Црна Гора во НАТО и ЕУ и и честиташе на спроведените реформи. Тој и се заблагодари и за нејзиното учество во мисијата ИСАФ во Авганистан.
Вујановиќ ја изрази подготвеноста на својата земја да продолжи со активностите со цел што побрзо членство во НАТО.
Црна Гора моментно е опфатена со Акциониот план за членство, кој се смета за предворје на полноправното членство во Алијансата.