Активистите од социјалните мрежи предлагаат на жителите на грчките острови да им биде доделена Нобелова награда за мир поради нивната солидарност и сочувство кон бегалците, објави денеска грчкиот весник „Етнос“.
Во рамките на кампањата активистите на интернет објавија две резолуции. Во едната резолуција се предлага Нобеловата награда за мир да им биде доделена на жителите на грчките острови во Егејско Море, а со другата резолуција Нобеловата награда за мир да им биде врачена на жителите на островот Лезбос и на организациите кои се посветени на бегалците.
За двете резолуции досега се собрани повеќе од 55.000 потписи. Меѓу иницијаторите се и познати личности, како актерката Сузан Сарандон, кинескиот уметник Ај Вејвеј и други.
Британската актерка Венеса Редгрејв денеска ќе го посети островот Лезбос.