Заводот за здравствена заштита на Словенија (ЗЗЗС) објави дека поради последните случувања со пандемијата на коронавирусот, очекуваат годинава во здравствената каса да влезат 225 милиони евра помалку од планираните.
Како што јави дописникот на МИА до Љубљана, од ЗЗЗС пресметале дека поради големиот број болувања тие ќе требаа да исплатат дополнителни 30 милиони евра како платено отсуство на работниците. Најголем дел од нив или беа на платен карантин поради коронавирусот или беа инфицирани.
Токму затоа од ЗЗЗС апелираат до Владата да подготви, а Собранието да изгласа интервентен Закон со кој преку буџетот на државата ќе се покрие големиот минус во здравствената каса.
За споредба минатата 2019 година ЗЗЗС реализираше приходи од над три милијарди евра.