Седумдесет и четиригодишниот Б.Ј. од пиротското село Сопот починал од труење со амонијак, додека педесет и петгодишниот камионџија Т.П. се здобил и со хемиски изгореници на дишните органи поради вдишување опасен гас, но имал и тешки повреди од падот.
Имаше одреден сомнеж за нивната смрт, имајќи предвид дека Б.Ј. бил пронајден во неделата во неговото возило, кое излетало од патот недалеку од фабриката „Tigar Tajers“. Давал знаци на живот но починал во Општата болница Пирот. Со оглед на тоа дека се работи за хроничен пациент, се посомневале дека имал срцев удар како последица.
Телото на камионџијата било откриено вчераутро, имал видливи повреди кои укажувале на пад од височина, но се сомневале дека бил и жртва на амонијак. Двете тела се испратени на обдукција во Институтот за судска медицина во Ниш.
Турскиот државјанин најверојатно останал зашеметен од опасниот гас, поради што паднал од мостот. Можно е одредено време да бил уште жив, иако се здобил со масовни политрауматски повреди, бидејќи констатирано е оштетување на дишните органи, што укажува дека бил во контакт со пареа од амонијак, кои предизвикуваат тешки изгореници. Истите повреди на дишните органи се констатирани кај седумдесет и четиригодишникот, со што се потврди сомнежот дека и тој е жртва на несреќата кај Пирот.
Танкерот во кој имало 45 тони амонијак се уште испушта опасен гас бидејќи е невозможно да се затвори дупката создадена при излетувањето од шините. Тој е еден од 20-те што беа во составот што превезе 900 тони амонијак, од кои четири излетаа од шините.