Со ново, трето писмо испратено до словенечката јавност, интелектуалци од лево-либерална оринетација, поголемиот број универзитетски професори, а некои и поранешни министри, предупредуваат на „авторитаризамот“ и недемократска практика на владејачката коалиција предводена од премиерот Јанез Јанша.
Во писмото, објавено во љубљанскиот весник Дело, тие потсетуваат дека повеќе пати предупредувале на недомократски и авторитарни пракси на актуелната десничарска Влада и на премиерот и неговата партија, но оти досега немало одѕив во политиката.
– Наместо ефикасно решавање на здравствената криза, премиерот, неговата партија и владејачката коалиција ја водат Словенија во авторитарно контролирано општество со ширење и поттикнување на говор на омраза, потоа ги кријат договорите од јавноста. Не очекуваме дека власта ќе се извини и ќе ги промени своите постапки бидејќи очигледно нејзините постапки се наменети за присвојување на власта и да ја претворат Словенија во недемократско и авторитарно општество, се наведува во писмото на Сојузот за демократска и праведна Словенија.
Интелектуалците наведуваат дека е потребно „да се запрe злоупотребата на епидемијата поради забрзаната реализација на идеолошките и партиски мотивираните владини проекти“. Тие, исто така посочуваат дека од нивното обраќање во ноември минатата година речиси 12.000 луѓе и над 50 здруженија, организации и друштва се потпишале за нивната иницијатива.
Во писмото се повторуваат обвинувањата на сметка на Јанша и неговата партија дека „шират и поттикнуваат“ говор на омраза, со што Словенија се приближува кон „илибералните“ режими во Средна и Источна Европа, дека се напаѓаат независните новинари и невладините организации, а тоа најмногу го прави премиерот со своите нетолерантни објави на социјалните мрежи.