Потпретседателот на владата на Словачка и министер за надворешни работи Мирослав Лајчак по повод самитот во Братислава на кој ќе присуствуваат и претставници на Приштина изјави дека Словачка не го смени својот став по прашањето за признавање на независност на Косово, но посакува европска перспектива за целиот регион.
-Не го сменивме нашиот став. Позицијата на Словачка е да не го признае Косово, но посакуваме европска перспектива за целиот регион. Никому не му е од интерес да постои црна дупка, каде што не владеат правото, законот и соработката. Нашиот став тука е постојан- изјави Лајчак за „Вечерње новости“.
Словачка во среда и четврток ќе биде домаќин на лидерите од централна, источна и југоисточна Европа, а на самитот треба да присуствуваат и претставници од Белград.
-Веруваме дека состанокот во Братислава ќе биде можност за разговор, за клучни политички, економски, социјални и безбедносни прашања поврзани со посткризниот развој на регионот и Европа. Очекуваме учество на 20 шефови на држави, вклучувајќи ги и претседателите на Србија и Косово, Томислав Николиќ и Атифете Јахјага – истакана Лајчак.
Елена Георгиевска