Мандатарот за формирање на Влада на Црна Гора, Здравко Кривокапиќ најави дека денеска во текот на денот ќе им го соопшти списокот со кандидати за членови на експертската влада на мнозинските партии, пишува „Побједа“.
Кривокапиќ за подгоричкиот весник изјави дека се водат разговори со кандидатите за министри кои, како што рече, го поминале првиот круг и сега се во последниот круг.
„Некои од нив се во странство и поради временската разлика е закажан разговор со нив доцна навечер преку Скајп, па додека не го завршам тоа, не би лицитирал со имиња“, изјави Кривокапиќ.
Кривокапиќ претходно најави дека владата ќе има 12 ресори, а според „Побједа“, листата на кандидати за министри ќе биде доставена до партиите до 16 часот.
Коментирајќи ја можноста одредени партии, пред се Демократскиот фронт, да не се согласат со неговиот предлог, Кривокапиќ вели дека ќе мора да достават јасни докази за сите тврдења што можат да ги изнесат за предложените кандидати.