Амбасадите на Косово во светот во иднина, освен дипломатските и политички, ќе вршат и културни активности преку културните аташеа кои ќе бидат именувани во текот на 2021 година.
Ова е предвидено со договорот за соработка меѓу Министерството за надворешни работи и дијаспора и Министерството за култура, млади и спорт на Косово, кој денеска го потпишаа министерките Мелиза Харадинај-Стубла и Вљора Думоши.
Шефицата на косовската дипломатија, Харадинај-Стубла оцени дека станува збор за значајно постигнување на двете министерства, што ќе придонесе за промоција и на културен план на Косово во светот и ќе ја пренесе позитивната слика за земјата на меѓународната сцена.
Министерката Думоши најави дека за културни аташеа ќе бидат именувани еминентни имиња од косовската култура и спорт, од кои се очекува да придонесат за развојот и јакнењето на културната и спортската дипломатија.