Владата на Косово денеска донесе нови, заострени, мерки за спречување на ширењето на епидемијата на Ковид-19, кои ќе бидат во сила во наредните 12 дена, односно од утре до 18 април.
Меѓу другото, се воведува забрана на движењето на граѓаните во периодот од 22 до 5 часот, се затвораат училиштата и се забранува работата на угостителските објекти (освен за достава), како и на трговските центри, вежбалниците и фитнес-центрите, освен оние на отворено.
На јавните и приватните предуниверзитетски институции им се наложува да ја одржуваат наставата онлјан во периодот од 12 до 18 април, додека универзитетите од 6 до 18 април, а воедно наредните 12 дена се затвораат и студентските домови и мензи.
Предвидени се и заострени мерки за јавни собири, културни, забавни и спортски настани, семејни прослави и погреби, ограничувања на бројот на патници во јавниот превоз и такси возилата и слично.
Новите мерки ги образложи министерот за здравство, Арбен Витиа, кој најави дека тие ќе се преиспитаат на 18 овој месец.
Витиа нагласи дека во изминатите две недели е забележан пораст на заболените и смртните случаи како последица на пандемијата. Конкретно, во изминатиот 14-дневен период имало 11.577 новозаболени и 150 починати, додека бројот на активни носители на вирусот моментно изнесува 13.902.
Последното деноноќие во Косово се забележани нови 11 смртни случаи и 512 заболени, со што бројката на починати достигна до 1.926 од вкупно 94.167 лица кај кои е откриен коронавирусот од почетокот на пандемијата. Вклучително вчерашните 524, болеста досега ја совладале 77.957 заболени.