Амбасадорот на Соединетите Американски Држави во Косово, Филип Коснет упати денеска критики до политичките партии затоа што во листите со кандидати за пратеници на наредните избори ставиле лица со криминално минато.
Коснет на својата страница на „Твитер“ напиша дека граѓаните не можат да ги сметаат за сериозни партиите кои дејствуваат спротивно од декларативните заложби за владеење на правото.
– Како можат граѓаните да ја земат за сериозна изразената заложба на политичките партии за владеење на правото, кога во листите на многу партии има индивидуи со активни обвиненија, со казни за кривични дела, како воени злосторства и напади и со меѓународни санкции за воени злосторства и корупција, напиша Коснет.
Вонредните парламентарни избори во Косово, по оставката, во јули годинава, на премиерот Рамуш Харадинај, ќе се одржат на 6 октомври. На изборите ќе учествуваат 21 политички субјект чии листи ги верификува Централната изборна комисија.