Плоштадите и парковите во неколку атински населби синоќа беа полни со друштва млади лица, кои собраа и покрај карантинот, рестрикциите и полицискиот час, а мнозинството беа без маски и не одржуваа дистанца.
Со „take away“ пијалоци од кафулињата уште во попладневните часови, младите излегоа како во центарот на Атина, така и во други населби, а за многумина „корона-забавата“ продолжи и по 21 часот, односно по почетокот на полицискиот час.
Во поголемиот број од случаите, не станува збор за претходно најавени и организирани забави. „Корона-забави“ имаше и изминатите викенди, но се чини дека како што се затоплува времето, така и овие неформални забави на отворено се зголемуваат.
Кафулињата во Грција се затворени веќе пет и пол месеци, а земјата е во карантин од 7 ноември 2020 година со воведен полициски час од 21 часот. Од почетокот на пандемијата регистрирани се 313.444 случаи на Ковид-19, а починаа 9.397 лица. Само во изминатата седмица, од понеделникот до вчера беа потврдени 18.039 заразени и 512 смртни случаи.