„Коха Диторе“: Изборите во Косово на 6 октомври

Од:

Граѓаните на Косово ќе се упатат кон гласачките кутии првата недела на октомври, доколку пратениците денеска гласаат за распуштање на Собранието, пишува весникот „Коха Диторе“.

Шести октомври како можен датум за одржување на предвремените избори косовскиот претседател Хашим Тачи ѝ го спомнал на претседателката на Централната изборна комисија (ЦИК) Ваљдете Дака, на средбата што вчера ја имаше со неа.

Како што јави дописникот на МИА од Приштина, извор од кабинетот на Тачи информира дека, според она што е разговарано со Дака, изборите ќе се прогласат веднаш по распуштањето на Собранието.

– Претседателот изјави дека доколку се распушти собранието в четврток, тој еднаш в петок, или најдоцна в понеделник, ќе го декретира датумот на предвремените избори. Тој одлучи изборите да се одржат на 6 октомври. Предвидената динамика може да се смени единствено доколку Собранието денеска не се самораспушти, вели изворот на „Коха Диторе“.

Косовското Собрание за денеска во 10 часот свика седница на чиј дневен ред е гласањето за распуштање на законодавниот дом, со што се отвора патот за предвремените парламентарни избори.

Пред гласањето за самораспуштање на шестиот парламентарен состав на Косово, како прва точка на дневниот ред на денешната седница е ратификацијата на финансискиот договор со Европската унија, со кој Косово треба да добие околу 100 милиони евра од ИПА фондовите.

По оставката, пред нешто повеќе од месец дена, на премиерот Рамуш Харадинај, косовските парламентарни партии, и од власта и од опозицијата, се договорија Собранието да се самораспушти на 22 август, по што претседателот Тачи треба да ги прогласи предвремените парламентарни избори.

Би можело да ве интересира

Хоџај: Пацоли го доведе во прашање признавањето на Косово

Над 42 илјади пријави од косовски печалбари за гласање на изборите на 6 октомври

Ана Ололовска

Курти: Косово сега не е во можност да и се придружи на Албанија

Ана Ололовска

КосоваПрес: Српски тајни служби во северно Косово ги набљудуваат КФОР, Еулекс и полицијата

Ана Ололовска

Двајца водачи на ОВК на распит пред Специјалниот суд за воени злосторства во Косово

Ана Ололовска

Скот: САД сакаат Косово да ги укине таксите за да се придвижи дијалогот со Србија

Ана Ололовска