Косово влегува во период кога престанува надгледуваната независност во услови кога е поделено одвнатре, а во меѓународни рамки е полулегитимна држава.
Поради тоа мора да бара нормализација на односите со Србија, оценува приштинскиот Институт за истражување и развојни политики (КИПРЕД).
Авторите на извештајот Иљир Деда и Шпенд Курсани прогнозираат дека прославата и еуфоријата за престанокот на надгледуваната независнот ќе ги засенат реалните проблеми на Косово.
Според нив, тоа се прашањето на северот и фактот дека пет држави на Европската Унија одбиваат да ја признаат независноста на Косово со што е блокиран патот од европската агенда.
„Поради неможноста да ги убеди своите членки да го признаат Косово, ЕУ не може
целосно да го искористи своето влијание на Приштина. Така Косово е ставено во позиција да бара нормализација на односите со Србија со надеж дека тие нови односи ќе доведат до промена на ставот на петте членки за статусот на Косово.
Резултатот од приближувањето на Белград и Приштина би можел да доведе до нови признавања на Косово, а тоа евентуално и до членство во ОН и другите релевантни меѓународни институции“, се вели во извештајот на КИПРЕД.