Албанскиот писател Исмаил Кадаре, кој живее во Франција, смета дека масовното заминување на Албанците од Косово претставува некој вид раселување, односно геноцид и уништување на една нација.
– Ова што се случува не е бегство, туку е еден вид раселување. Раселувањето е една од најтешките форми на геноцид, тоа е метод за уништување на една нација. Дознав и сум вџашен дека меѓу оние кои бегаат има и шест илјади албански деца од основните училишта, изјави Кадаре во интервју за „Гласот на Америка“.
Тој наведе дека масовното иселување не може да се образложи само со лошата економска ситуација.
– Ова е некој вид на психоза, едно морално попуштање, кое е мошне тажно, изјави Кадаре.
Тој остро ги критикуваше властите на Косово, додавајќи дека не можат да кренат раце и во ваква ситуација „никој од нив да не преземе ништо“.
Кадаре е најпознат албански писател и најголем критичар на власта во Албанија, кој живее во Франција.