Потрагата по младиот Хрват продолжи утринава во 7 часот, но Матеј Периш се уште не е пронајден. Денеска се пребаруваше Дунав, од брегот и по текот, на двете страни на реката, но се вршеше и пребарување низ брегот кон Панчево.
Според информациите на српските медиуми, доколку телото се наоѓа во водата треба да исплива за околу 15 дена, доколку не е заглавено некаде.
Нова информација немаше ниту осмиот ден од исчезнувањето. Полицијата извршила пребарување на дел од вливот на Сава и Дунав. Повторно можеа да се забележат бродовите на речната полиција и жандармеријата, но јасно е дека потрагата се врши со помал интензитет.
Таткото на Матеј ја следеше и денеска операцијата на полициските сили кои трагаат за неговиот син, и убеден е дека заедно ќе се вратат во Сплит.
„Излегоа многу работи, има работи што не се во ред, има некои погрешни снимки, но полицијата има свој пат и план и работи, како што гледам, според протокол кој е организиран и насочен кон целта. . Многу работи се случуваат, не би дал детали што ги знам, но верувајте дека се неважни за јавноста, сето тоа се некои методи“, изјави Ненад Периш.
Тој е убеден дека тој и неговиот Матеј ќе се вратат во Сплит, како што повеќепати има кажано „сто посто“: „Затоа сум тука, не заминувам од тука без него. Секој што има деца може да разбере што велам“.
Во наредните денови потрагата по Матеј ќе биде под влијание на временските услови бидејќи е најавено влошување на времето.