Хоти: Српската листа ќе биде дел од новата Влада на Косово

Од:

Мандатарот за формирање на новата Влада на Косово од редовите на Демократскиот сојуз на Косово (ЛДК), Авдулах Хоти, објави дека постигнал договор со најголемата партија на косовските Срби, Српската листа (СЛ), за нејзино учество во неговиот кабинет, кој очекува дека ќе го состави многу наскоро, јави дописникот на МИА од Приштина.

Во изјава за медиумите пред партиското седиште, Хоти информира дека СЛ и во новиот владин кабинет ќе ги има истите функции кои ги имаше и во досегашната Влада, предводена од вршителот на должноста премиер, лидерот на Движењето самоопределување (ВВ), Албин Курти.

Хоти ги отфрли како неосновани барањата на ВВ на Курти и на опозициската Демократска партија на Косово (ПДК) на Кадри Весели, за одржување вонредни парламентарни избори веднаш по надминувањето на пандемијата на Ковид-19, нагласувајќи дека, сé додека во Собранието на Косово има мнозинство кое може да формира влада, нема потреба од предвремени избори.

Откако порано во текот на денешниот ден беше постигнат договор за коалиција со Алијансата за иднината на Косово (ААК) на поранешниот премиер Рамуш Харадинај, Хоти изрази уверување дека многу наскоро, веројатно до крајот на денот, ќе се договори и со останатите идни коалициони партнери во новата влада.

Во владата која треба да се формира откако на 25 март му беше изгласана недоверба на кабинетот на Курти, покрај ААК и СЛ, според најавите од ЛДК, се очекува да партиципираат и Социјалдемократската иницијатива (Нисма) на Фатмир Лимај и партиите на помалите етнички заедници во Косово. Од ЛДК тврдат дека се обезбедени потребните гласови во Собранието за поддршка на кабинетот што ќе го предложи Хоти.

Актуелната влада во оставка, предводена од лидерот на ВВ Албин Курти, беше разрешена од Собранието на Косово, откако на 25 март, на иницијатива на ЛДК, која дотогаш беше дел од кабинетот на Курти, ѝ беше изгласана недоверба со повеќе од две третини од гласовите на пратениците.

 

Би можело да ве интересира

Дачиќ: Договорите од Брисел се круна на учеството на Белград во дијалогот, ЗСО им дава широк спектар на надлежности на Србите

Ана Ололовска

Курти: Добив предупредувања за намалување на западната поддршка доколку Косово не биде конструктивно

Горан Наумовски

Кирби: Ситуацијата со Косово е поврзана со танцот на Курти и Вучиќ, договорот за ЗСО е постигнат одамна

А1он

(ВИДЕО) Новите сметки донесоа гнев – зошто повеќе пари за пренос отколку за потрошена струја?

РСЕ: Лајчак во Приштина на средба со косовскиот вицепремиер

Ана Ололовска

Хрватски пратеник: Србите од Хрватска добиваат повици за мобилизација во случај на војна на Косово

А1он