Грчките власти денес покренаа обвиненија против петтмина мажи, меѓу кои и двајца тенисери од Франција, за групно силување на американска тенисерка во тек на еден турнир.
Американката изјавила дека имала доброволен сексуален однос со едно момче од Романија, но тврди дека потоа била групно силувана од Французи и еден Германец, пренесе агенцијата „Франс прес“.
Наводно силувањето се случило на 3-ти октомври, на прослава која што била организирана во еден хотел, во градот Маратон во близина на Атина, во кој се одржувал тенискиот турнир.
Петтмината осомничени, чии имиња не се објавени, во моментов се наоѓаат во притвор, каде што ги очекува судење. Тие ги отфрлиле наводите и изјавиле дека не се виновни за ништо.
Елена Георгиевска