Од европската вселенска станица во Куру, Француска Гвајана, утре, во 23.01 часот по грчко време, во носечката ракета Ариана 5, ќе биде лансиран сателитот Hellas Sat 4 што ќе ги користи грчката и кипарската орбита, јави дописничката на МИА од Атина.
Сателитот Hellas Sat 4 ќе обезбеди иновативни сателитски услуги, а според генералниот секретар за телекомуникации на Грција, Василис Магларас лансирањето е од особена важност, а со тоа „земјата ќе ги искористи целосно своите права на 39 степени на исток што е орбиталната позиција на Грција“.
-Лансирањето е од особена важност и треба да ги разгледаме сите можности што ни ги дава вселената. Сателитите се користат најчесто за национална одбрана, за јавна безбедност на војската, на полицијата, на безбедносните тела и за телкомуникациите на земјата, вели Магларас за радиото „Практорио фм“ на грчката новинска агенција.
Тој објаснува дека Hellas Sat 4, е еден од најголемите и најсовремени сателити.
Новиот сателит на Hellas Sat, што е прв од ваков вид во светот, паралелно ќе биде и хибриден сателит. Hellas Sat 3 од 2017 година веќе е во вселената.
-Станува збор за сателит кој ќе биде хемиски додека да се постави во орбитата, а потоа ќе биде базиран на електричен погон. Овие нови софистицирани технологии ќе му овозможат на сателитот да биде повеќе во вселената, објаснува за грчката новинска агенција АНА-МПА, извршниот директор на„ Hellas Sat“, Кендеас Карандонис.
На сателитот ќе бидат поставени грчкото и кипарското знаменце, на лансирањето ќе присуствуваат претставници на владите на Кипар и на Грција, а лансирањето ќе го пренесуваат во живот грчката државна телевизија ЕРТ и кипарската телевизија Капитал.