Претседателот на Црна Гора Мило Ѓукановиќ на состанокот со шефот на делегацијата на ЕУ во Подгорица, Оан Кристина Попа, изјави дека преминот на власта во државата се одвива без проблеми и покрај неоправданите сомнежи за можни опструкции на дел од домашната и меѓународната јавност.
Тој и се заблагодари на европската амбасадорка за извештајот од ЕК за напредокот на Црна Гора и упати честитки до мандатарот кој ќе ја формира новата црногорска влада.
„Доделувањето мандат на предложениот кандидат е придонес за поттикнување на брзото формирање на владата со цел преземање на обврски важни за функционирање на државата и благосостојба на граѓаните. На тој начин, потврдуваме дека националниот интерес на Црна Гора е пред сè”, рече Ѓукановиќ.
Тој истакна дека ќе биде поддржана секоја одлука и иницијатива што е од интерес за Црна Гора и нејзиниот европски пат.
Претседателот на државата оцени дека извештајот на Европската комисија е очекуван и реален поглед на партнерите и истакна дека е важно да се види како може да се динамизираат реформите и да се подобри перцепцијата.
Од друга страна, европската амбасадорка во земјата Кристина Попа изјави дека Црна Гора е лидер во регионот во процесот на интеграција и дека е важно да се продолжи по тој пат.
Попа ја повтори својата силна посветеност да помогне во владеење на правото и судските реформи преку соработка со новата влада, парламентот и претседателот, така што Црна Гора може да направи понатамошен напредок кон членството во ЕУ.