Претседателот на Црна Гора, Мило Ѓукановиќ денеска соопшти дека нема да го потпише разрешувањето на началникот на Генералштабот на Армијата на Црна Гора, генерал-мајор Драгутин Дакиќ и разрешувањето и престанокот на службата на генерал-мајор Рајко Пешиќ.
Наместо тоа, вели тој, ќе свика седница на Советот за одбрана и безбедност и веќе го овластил секретарот да го усогласи датумот на нејзиното одржување.
Ѓукановиќ рече дека на 29 декември минатата година ги добил двата предлога од Министерството за одбрана, кои ги потпишале двајца членови на Советот за одбрана и безбедност – претседателот на Парламентот на Црна Гора, Алекса Бечиќ и премиерот Здравко Кривокапиќ.
Тој изјави дека од медиумите дознал дека овие предлози се придружени со одлуката на министерот за одбрана за пензионирање на началникот Дакиќ.
Во соопштението се потсетува дека Одлуката за назначување и разрешување на началник на Генералштабот е во исклучителна надлежност на Советот за одбрана и безбедност, кој одлуките ги донесува со консензус.
Ѓукановиќ изјави дека во работата на Советот постои и практика да се одлучува помеѓу одржување на седници со согласност и потпис на неговите членови, за бројни прашања од неговата надлежност.
Сепак, како што наведува тој, до сега Советот за одбрана и безбедност никогаш не донел одлука за избор и разрешување на началник на Генералштабот без претходна седница на Советот.
„Ниту овојпат нема причина за нова практика. Верувам дека евентуалната промена на шефот на Армијата е прашање од државна важност што заслужува седница на органите што ги сочинуваат тројцата највисоки учесници во законодавната и извршната власт, изјави Ѓукановиќ.