Министерството за здравство на Косово објави денеска дека две лица починале во раните утрински часови на Инфективната клиника на Клиничкиот и универзитетски центар на Косово како последица на Ковид-19, јави дописникот на МИА од Приштина.
Жртви на новиот коронавирус се 59-годишен маж од Приштина и 70-годишна жена од село Кориша во Призрен. Обајцата страдале од пропратни болести, потешки форми на дијабетес, и биле примени на Инфективно во тешка здравствена состојба – мажот пред два, а жената пред четири дена.
Со ове два случаи, вкупната бројка на починати од Ковид-19 во Косово се зголеми на три, откако на 22 март почина 82-годишен маж, кој страдал и од хронични респираторни болести. Заразени се, заклучно со вчерашниот ден, 145 лица.