На проектот Јужен тек Бугарија гледа како на ефиканска мерка за подобрување на енергетската безбедност на земјата, изјави бугарскиот министер за надворешни работи Кристијан Вигенин.
Во интервју за ИТАР-ТАСС, Вигенин потсети дека ставот на Бугарија е дека е важна реализацијата на проектот Јужен тек, како поради диверсификацијата на снабдувањето со гас, така и на економски план.
– Сметаме дека сите проекти кои можат да диверсификуваат извори и маршрути на снабдување, треба да се гледаат и како дел од мерките за подобрување на енергетската безбедност. Јужниот тек е европски проект, не само поради тоа што вклучува неколку земји-членки на ЕУ, туку и поради тоа што како европски проект мора да биде во согласност со европските закони и прописи, изјави бугарскиот министер.
В понеделник, во Софија ќе допатува шефот на руската дипломатија Сергеј Лавров, по повод 135 години од воспоставувањето дипломатски односи меѓу Бугарија и Русија.