Треба да се согласам со сите кои велат дека ова е важен чекор, но дозволете ми да кажам дека не е голем чекор, вели министерот за надворешни работи на Грција Никос Дендиас во интервјуто за „Јуроњуз“ во однос на прелиминарните разговори со Турција што по пауза од речиси пет години се одржаа во понеделникот, јави дописничката на МИА од Атина.
Објаснува дека не станува збор за преговори, туку за разговори на амбасадорско ниво кои што ги одредуваат условите за да има вистински преговори.
-Ова беше прва средба по пет години. Патем, да бидеме искрени, Турција беше таа која ги прекина разговорите во 2016 година, а не Грција, како што тврди Турција. Но, надвор од тоа, важно е дека продолжија. Ова беше прва средба, сфаќам дека беше средба за одново да се сретнеме. Ќе видиме каде ќе одиме понатаму. Треба да бидеме реалисти, но исто така треба да бидеме и оптимисти, рече Дендиас.