За жал, се уште немаме одговор на Меморандумот за разбирање кој Грција го испрати на Македонија, изјави денеска портпаролот на грчкото Министерство за надворешни работи Григорис Делавекурас.
– Нашиот предлог е иницијатива на Грција и чекаме јасен, позитивен одговор кој ќе даде нова динамика во преговарачкиот процес. Иницијативата е и поддршка за овој процес која ќе придонесе за големо подобрување на климата во нашите билатерални односи и уште повеќе ќе ги развие постоечките потенцијали, рече Делавкурас.
На новинарско прашање за почитување на човековите права во Грција, посебно за малцинствата, тој изјави дека „во Грција има само муслиманско малцинство и ништо друго“.
– Постојат некои организации и групи кои се обидуваат да создадат ситуации и се обидуваат да гетоизираат дел од грчката популација. Но, тие не успеваат во тоа затоа што во Грција постои хармоничен соживот во општеството кој придонесува заедно да одиме напред, изјави Делавекурас.