Српскиот премиер Ивица Дачиќ изјави дека Белград и Приштина се уште се далеку од договор по прашањето за надлежноста на заедницата на српските општини на Косово, бидејќи Србија бара заедицата да има извршни овластувања, а косовската страна тоа не го прифаќа.
-Тие не прифаќаат заедницата на српските општини да има извршни овластувања. Останува да видиме дали е можно да дојдеме до некаков договор. Ние повеќе немаме каде да попуштиме. Не лажеме, не се ценкаме и тоа го зборуваме отворено. Договорот е можен, но се уште сме далеку од тоа – изјави Дачиќ.
Според него доколку мислат дека Србите на Косово ќе се занимаваат со издавање на списание и дека тоа е доволна надлежност на заедницата, тогаш се далеку од договор.
-Договорот е можен, шест пати разговарав со Тачи, но доколку тој смета дека не мора да попушти за да има договор, тогаш многу тешко е да се очекува постигнување на договор – изјави премиерот.
Тој додаде дека е потребна цврста меѓународна гаранција за безбедност на Србите на Косово, како што истите гаранции се потребни и во дијалогот помеѓу Белград и Приштина.
-Ние не можеме сега да одиме на договор со Приштина, а по десет години некој да дојде и да каже дека договорот не важи, затоа ни е потребна меѓународна гаранција – објасни Дачиќ, кој утре ќе присуствува на комеморативната академија во Новиот театар во Белград, по повод деветгодишнина од мартовското насилство на Косово.
Елена Георгиевска