Грчкиот премиер Алексис Ципрас изјави дека не прифаќа веќе уцени и дека во Грција на 5 јули ќе биде одржан референдум за тоа дали Грција ќе го прифати или отфрли предлогот на меѓународните кредитори.
За ова веќе ги информирал францускиот претседател Франсоа Оланд, канцеларката Ангела Меркел, како и шефот на Европската централна банка, Марио Драги.
„После пет месеци тешки преговори, нашите партнери, за жал, изнесоа предлог кој што е ултиматум за грчката демократија и грчкиот народ. Ултиматум кој што е спротивен на основните принципи и вредности на Европа“, рече Ципрас во обраќањето на државната телевизија.
На референдумот Грците ќе одлучат дали ќе ги прифатат условите што ги нудат кредиторите – ММФ, ЕУ и Европската централна банка, односно дали ќе се согласат на зголемување на даноците и намалување на пензиите во вкупна вредност од 8 милијарди евра, за кредиторите да пуштат нова транша од помош за грчката економија.
Европските кредитори и ММФ на Грција и понудија спогодба која што грчката влада ја отфрли како неприкладна.