Борел: Ја следиме ситуацијата во северниот дел на Косово, провокациите се неприфатливи

Од:

Високиот претставник на ЕУ за надворешни работи и безбедносна политика, Жозеп Борел изјави дека продолжува внимателно да ја следи ситуацијата на северот на Косово и им порача на двете страни дека сите дополнителни провокации или еднострани и некоординирани дејствија се „неприфатливи“.

– Србија и Косово мора безусловно да ја деескалираат ситуацијата на терен со итно повлекување на специјалните полициски единици и отстранување на блокадите на патиштата, изјави Борел во соопштението на Европската служба за надворешни работи.

Тој истакна дека Србија и Косово мора да најдат решение за да ја смират ситуацијата и да се договорат како да се оди напред, а ЕУ „активно ќе ги поддржи тие напори“.

– И косовските и српските лидери се целосно одговорни за секој ризик по безбедноста и благосостојбата на заедниците во Косово и во Србија. Го истакнав тоа во моите повици до претседателот Вучиќ и премиерот Курти оваа недела, кажа Борел.

Тој нагласи дека дијалогот со посредство на ЕУ останува единствената платформа каде што се разговараат и решаваат сите отворени прашања меѓу страните, вклучително и прашања поврзани со слободата на движење и регистарските таблички, порачувајќи дека „силно ги повикува Косово и Србија да го искористат. “

Пристигнувањето на двајцата главни преговарачи во Брисел во наредните денови е првиот позитивен чекор, изјави Борел, додавајќи дека е клучно тие да дојдат со мандат да разговараат за тоа како да продолжат понатаму и да најдат одржливи решенија што се во интерес на граѓаните.

– Повторуваме – очекуваме и Косово и Србија да се вратат на подобрување на околностите кои водат кон помирување, регионална стабилност и соработка за доброто на своите граѓани. Ова е клучно за постигнување сеопфатен и правно обврзувачки договор за нормализација на нивните односи, што е неопходно и за двете страни да напредуваат на својот пат кон ЕУ, изјави Борел.

Тој изјави дека е во контакт со генералниот секретар на НАТО, Јенс Столтенберг на кого му се заблагодари за вонредната соработка меѓу КФОР и Еулекс.

– КФОР има клучна улога во поддршката на регионалната стабилност на Западен Балкан, заклучи шефот на европската дипломатија.

Би можело да ве интересира

Борел ги повика Вучиќ и Курти во Брисел на нова рунда преговори

Стано: Реакцијата на Борел за Косово се однесува на поширокиот контекст, не на полициската операција

Катерина Павлова-Николовска

Борел замина во дводневна посета на САД

Ана Ололовска

Заев – Борел: Никој нема забелешки за реформите на Македонија, граѓаните заслужуваат европска иднина

А1он

Борел: Македонија и нејзините граѓани заслужуваат да напредуваат на патот кон ЕУ

А1он

Рама во Абу Даби се сретна со Борел

А1он