На плоштадот бан Јелачиќ во Загреб започна протестот против воведување кирилица во Вуковар, но и во цела Хрватска.
На плоштадот се соберени илјадници граѓани, а организаторите најавија учество на поголем број демонстранти, отколку на претходниот собир во Вуковар, кога имаше 20.000 луѓе. Сообраќајот во центарот на градот е во прекин.
Собирот го организира Штабот за одбрана на хрватскиот Вуковар, а насобраните граѓани носат знамиња и транспаренти, а некои се облечени дури и во воени униформ. На транспарентите пишува „Вуковар е моја Хрватска“, „Ние рековме не“, и извикуваат „Вуковар, Вуковар“.
Претседателот на Хрватска, Иво Јосиповиќ синоќа изјави дека очекува собирот да биде во рамките на законот и дека граѓаните ќе се придржуваат кон тоа.
Премиерот Зоран Милановиќ неодамна изјави дека кириличните натписи во Вуковар ќе бидат поставени до локалните избори во мај. Тој предупреди дека многумина се обидуваат да го злоупотребат воведувањето на двојазичноста и порача дека ќе се спроведе Уставниот закон, кој овозможува двојазичност.
Елена Георгиевска