Поранешниот албански претседател и експремиер Сали Бериша, реагираше во врска со ставот на претседателот на Србија, Александар Вучиќ за реципроцитет на регистарските таблички со Косово.
Бериша во објава на Фејсбук напиша дека на денешната прес-конференција Вучиќ му се заканувал на Западот за Косово.
-Претседателот, големосрбоманот Вучиќ денеска свика вонредна прес-конференција на која отворено му се закани на Западот, наведувајќи дека „не верува дека сакате конфликт на Косово“, пишува тој.
Бериша, кој веќе се смета за лидер на Демократската партија уште наведува дека „Вучиќ е закана за мирот и стабилноста во регионот и дека претставува мал Путин на Балканот“.
-Го предупредувам претседателот на Србија да ги остави заканите и да не се осмелува на никаков авантуристички чин, бидејќи го чека судбината на касапот на Балканот, неговиот духовен отец Слободан Милошевиќ, наведува Бериша.
Извор: МИА