Косовскиот претседател Атифете Јахјага денеска изјави оти дијалогот со Белград е најдобар начин за нормализација на односите, порачувајќи им на граѓаните од северниот дел на земјата дека Косово е нивна татковина.
Таа во годишното обраќање пред Парламенртот во Приштина истакна дека косовските власти во општините во Северно Косово ќе воспостават „ред и владеење на законите, расформирање на сите структури поврзани со организираниот криминал, илегалната трговија и корупцијата“ за да се „врати довербата на граѓаните од овој дел на земјата во институциите на Република Косово“.
Јахјага на граѓаните од северниот дел на земјата им се обрати и на српски јазик.
– Ги повикувам граѓаните на српската заедница, посебно тие од општините од северниот дел на земјата, да гладаат кон својата иднина заедно со другите граѓани на Косово. Вашата татковина е Косово, место на големи аспирации и можности. Вашата татковина е Косово, земја на надежи и заеднички одговорности. Ајде заедно да ја изградиме за наша корист, за побезбедна и подобра иднина, посочи Јахјага.
Таа апелираше и до српските власти да „престанат со финансирање и поддршка на илегалните и криминалните структури во северниот дел на Косово“, кои „ги држат во заложништво обичните граѓани“.
– Бараме од властите на Република Србија да се откажат од мешањето во внатрешните прашања на Република Косово. Стабилноста на Косово, како независна и суверена држава е стабилност за регионот и пошироко. Нашите односи не можат да ја држат во заложништво стабилноста на Европа и не можат да го загрозат општиот развој на Западен Балкан.