Припадници на Министерството за внатрешни работи на Кантонот Сараево во соработка со Службата за работи со странци на подрачјето на Сараево вечерва спроведуваат голема акција за лоцирање на мигрантите, нивно евидентирање и превезување до соодветни сместувачки капацитети.
Акцијата почна пред железничката и автобуската станица од каде мигрантите беа префрлени во прифатните центри.
– Приливот на мигранти е неконтролиран и нивниот престој на отворено, на јавни простори, но и во импровизирани сместувачки капацитети кои не се предвидени за таква намена може да влијае на безбедносната состојба во Кантонот Сараево, изјави портпаролката на Министерството за внатрешни работи, Сувада Кулдија.
Сите мигранти ќе бидат евидентирани, фотографирани, а ќе им бидат земени и биометриски податоци.
Полициските активности ќе продолжат со детална проверка на улиците, парковите, трговските центри и други јавни простори и напуштени објекти.