Бугарија да ја поддржи кандидатурата на Македонија за ЕУ, само ако Македонија ja прекине антибугарската пропаганда. Вака одговориле 44% од Бугарите според податоците од националната репрезентативна студија на НЦИОМ, спроведена меѓу 30 ноември и 6 декември 2012 година.
Според бугарските медиуми, испитувањето на јавното мислење покажало дека за ваква позиција почесто се залагаат луѓето на возраст меѓу 30 и 39 години, испитаниците со средно и повисоко образование, луѓето со среден и повисок животен стандард и кои што живеат во градовите. Не се забележува политизација на мислењата, односно кој со колку еднакви удели од симпатизерите на бугарските политички партии ја поддржуваат оваа позиција.
18% од испитаниците се на мислење дека Бугарија воопшто не мора да ја поддржува кандидатурата на Македонија за ЕУ. Почесто вака размислуваат симпатизерите на националистичките партии – Напад и НФСБ.
Само 8% сметаат дека Бугарија треба безусловно да ја поддржи кандидатурата на Македонија за членство во ЕУ.
31% од учесниците во истражувањето не сакаат да го дадат своето мислење. Почесто тоа се жените, млади луѓе помеѓу 18 и 29 години, ниско образованите и сиромашните луѓе, жителите на селата и Ромите, пренесуваат бугарските медиуми.