Актерот Алек Болдвин случајно уби член на филмската екипа, а го повреди и режисерот и сценарист на новиот филм „Rust“.
Актерот со реквизит пиштол го убил директорот на фотографија и го ранил режисерот Џоел Соузa, ги пренесува Гардијан зборовите на властите во Ново Мексико.
„Шерифот потврдува дека две лица биле застрелани на сетот на „Rust“. Директорката на фотографија Хејлин Хачинс (42) и режисерот Џоел Соуза (48) биле застрелани кога актерот и продуцент Алек Болдвин пукал од реквизит пиштол“, се вели во извештајот.
„Госпоѓа Хачинс со хеликоптер беше пренесена во болница каде беше прогласена за мртва. Соуза е во болница на лекување“, се додава во извештајот.
Не се соопштува колку се сериозни повредите на Соуза.
Се наведува дека истрагата е отворена и активна, а во врска со овој инцидент не се преземени никакви правни дејствија.
Од канцеларијата на шерифот изјавиле за Гардијан дека Болдвин доброволно разговарал со истражителите и си заминал по разговорот.
Претставниците на медиумите на Алек Болдвин изјавија дека до инцидентот дошло откако актерот пукал од пиштол со лажна муниција, без да наведат детали.
Снимањето е прекинато.