Италијанската полиција истражува потенцијално кршење на здравствените ковид протоколи од страна на напаѓачот на Јувентус, Кристијано Роналдо, кој заедно со девојката Георгина Родригез го посетил ризичниот регион Вале д’Аоста, на северозападот на Италија.
Локалната полиција, како што јави италијанската агенција АНСА, потврдила дека во тек е истрага за дводневниот престој на Роналдо и неговата девојка Георгина Родригез, во вторникот и средата, во алпското гратче Курмајер, близу границата со Франција.
Како доказ се наведуваат видеоснимките на кои се гледа како Роналдо и Георгина седат на моторни санки, прославувајќи го 27-от роденден на Родригез. Од нивниот престој во зимскиот центар „протече“ и снимка на која се гледа како се опуштаат голи во базен со топла вода на отворено.
Во Италија на сила е забрана за патување во регионите кои се во „портокалова зона“ поради епидемијата на коронавирус, што ги вклучува и областите Пиемонт и Вале д’Аоста.
Доколку се докаже дека Роналдо патувал во ризичниот регион го очекува висока парична казна, наведува италијанската агенција.