Македонскиот народен театар по повод новогодишните и божиќните празници вечер бесплатно ќе ја изведе претставата „Парите се отепувачка“ по текст и режија на Бојан Трифуновски.
Авторот е инспириран од истоимената драма на Ристо Крле и од романот „Деветта конфигурација“ на Вилијам Питер Блати.
Во неа играат Николина Кујача, Славиша Кајевски, Гораст Цветковски и Софиа Насевска. Сценограф и костимограф е Мери Георгиевска, музиката е на Кантон 6.
Поради големиот интерес, МНТ соопшти дека „Парите се отепувачка“ со слободен влез за публиката ќе биде изведена и во вторник, 8 јануари, од 20 часот.
Од 18 часот тој ден бесплатно ќе биде изведена и „Сребрена свадба“ по текст на Маркес и режија на Звезда Ангеловска, во која игра Катина Иванова. Сценографијата е на Теодора Стојановска, а костимографијата на Ѓурѓица Спасовска.
Подигнувањето на влезниците за претставите е од билетарницата на МНТ без резервации.