Шломо Сулајман, најстариот Израелец, почина вчера на 117 години, објавија денеска израелските медиуми.
Тој починал опкружен од членовите на семејството, шест деца и десетина внуци, правнуци и чукунвнуци, пренесуваат медиуите од земјата.
Сулајман, Евреин од Јемен, со сопругата и четирите деца во 1949 година пристигнал во Израел од арапската земја. Другите две деца се родени во Израел. Тој со семејството живеел во приморскиот град Нетанја и по отслужувањето на воениот рок работел како земјоделец.
Неговата сопруга почина пред неколку години на 94–годишна возраст.
Внукот на Сулајман, Гил Радија, изјави дека неговиот дедо секој ден одел во синагога и оти до последен момент бил со бистар ум. Тој истакна дека тајната на долговечноста на Сулајман била малку храна и физичка активност. Поради пандемијата со Ковид-19 последните месеци не го напуштал домот.
Сулајман, како што тврди семејството, е роден во 1903 година, со што беше и еден од најстарите луѓе во светот.
Највозрасна во светот во моментот е Јапонката, Кане Танака која има 117 години и 283 дена.