Во Музејот на Град Скопје вечер ќе биде изложено познатото керамичко машко торзо Адам од Говрлево и ќе биде промовирана монографијата „Церје – Говрлево и Милош Билбија“ од Љубо Фиданоски, кустос за неолит во Музејот.
Како што соопшти Музејот на Град Скопје, Адам ќе си го добие заслуженото место меѓу археолошките неолитски експонати во посебна витрина и со соодветен каталог, како исклучителен неолитски наод од автентичното културно наследство на Македонија.
Монографијата се состои од два дела кои одделно зборуваат за локалитетот Церје – Говрлево (историјатот на истражувањата и дел од откриените наоди) и за животниот пат на археологот кој го откри и валоризира локалитетот, Милош Билбија, како и неговите објавени и необјавени размислувања, односно нераскинливата врска меѓу Билбија и Говрлево.
Со оваа манифестација ќе се одбележат 30 години од првите археолошки истражувања на локалитетот кој досега има дадено голем допринос за праисторијата на Македонија и пошироко.