Голем број продавници во Велика Британија кои продаваат артикли кои не се најпотребни, денес се отворени за првпат од март, кога беа воведени рестриктивните мерки поради пандемијата на коронавирусот.
Купувачите се придржуваа до правилото за физичка дистанца, што беше еден од условите за безбедно отворање на продавниците. Но, кабините во продавниците за облека и понатаму се затворени, по налог на здравствените власти.
Компаниите очекуваат намален број на купувачи во своите продажни објекти, а голем број луѓе што се собраа пред една продавница на „Епл“ во центарот на Лондон, рекоа дека дошле за поправка или за враќање на производи што ги купиле претходно.
Во Велика Британија забележани се безмалку 300.000 случаи на Ковид-19, од кои речиси 42.000 починале.