Премиерот Зоран Заев денеска во присуство на министерот за транспорт и врски Горан Сугарески се сретна со претставници на Асоцијацијата на здруженија на работодавачи на превозни трговски друштва МАКАМ-ТРАНС предводени од генералната секретарка Биљана Муртовска.
На средбата, како што информира владината прес-служба, се разговарало за прашања од интерес на превозниците при што е договорено со поактивна институционална соработка да се пристапи кон нивно решавање согласно законите во државата и искуствата и регулативите на ЕУ.
Од Владата информираат дека од страна на претставниците на МАКАМ-ТРАНС е истакнато дека за првпат со еден премиер можат отворено да разговараат за отворените прашања и проблеми.
Договорено е зголемување на заложбите за реализација на обезбедувањето дозволи согласно Спогодбата за асоцијација и стабилизација потпишана со ЕУ, а споделени се и информации околу финализирање на Спогодбата со Германија за штаер картата, што би значело и намалување на трошоците за патни такси. Постигната е согласност за вложување поголеми напори за освојување на нови транспортни пазари како Казахстан, Киргистан, Азербејџан, Грузија и Ерменија преку потпишување на билатерални спогодби, а разговарано е и за доделувањето ЦЕМТ дозволи во интерес на големите и малите превозници на стоки.
На средбата станало збор и за можностите за решавање на проблемите со казни што ги имаат превозниците на некои царински простори во други држави. Договорено е, претставниците на МАКАМ – ТРАНС да достават и забелешки на законите кои се во собраниска процедура, а кои се однесуваат на транспортниот сектор.