Гасоводот „Набуко“ е неуспешен проект, пишува австрискиот весник „Пресе“.
Гасоводот требаше да пренесува касписки гас до Европа од крајот на 2017 година, додека азербејџанското наоѓалиште „ШахДениз“ се оценуваше како најважниот извор на гас во проектот.
Конзорциумот, кој управува со наоѓалиштето, сепак се одлучил за конкурентскиот проект за Транс-јадрански гасовод (ТАП), кој минува преку Грција, Албанија и Италија, наведува весникот.
Во конзорциумот учествуваат компаниите БП, Статоил, Тотал, Лукоил, иранското нафтено здружение Ен-Ај-Оу-Си, турската ТПАО и азербејџанскиот енергетски гигант СОКАР. Неодамна БП потврди дека одлуката ќе биде објавена кон крајот на јуни 2013 година.
Акционери во конзорциумот Набуко се австриската О-Ем-Ви, унгарската ФГС, бугарскиот Булгаргаз, романскиот Трансгаз и турскиот БОТАШ. Според плановите гасоводот Набуко-Запад треба да пренесува гас од бугарско-турската граница преку Бугарија, Романија и Унгарија до Австрија.