НА Вол Срит цените на акциите паднаа, па берзанските индекси завршија во црвено и на месечно и на квартално ниво, додека во целата прва половина од годината забележаа најголем пад во повеќе од 50 години.
Dow Jones вчера загуби 253 поени или 0,82 отсто, на 30.775 поени, додека S&P 500 се лизна за 0,88 отсто, на 3.785 поени, а индексот Nasdaq загуби 1,33 отсто, на 11.028 поени.
Сите три индекси забележаа пад во целиот втор квартал, а два квартали последователен пад на S&P 500 и Dow индексот не се паметат од 2015 година.
Во целата прва половина од годината Dow Jones потона за повеќе од 15 отсто, S&P 500 за повеќе од 20 отсто, а Nasdaq индексот за речиси 30 отсто.
Ова е најлошата прва половина од годината за индексот S&P 500 од 1970 година, за Dow Jones од 1962 година, а за Nasdaq најлоша од неговото постоење.
Во првите денови од оваа година, индексите достигнаа рекордни нивоа, исто како и минатата година, благодарение на закрепнувањето на економијата од корона кризата, но набрзо правецот на пазарот стана обратен поради ширењето на омикронската варијанта на Ковид- 19.
Потоа дојде руската инвазија на Украина, која го наруши пазарот на енергија, суровини и храна и со тоа дополнително го поттикна растот на и онака високата инфлација.