„Во моментот кога целата експертска јавност во областа на енергетиката го поздравува фактот што Македонија направи крупен исчекор во процесот на нејзино гасифицирање, СДСМ како и за сите други 2000 проекти кои ги направи Владата, не успева да ја скрие желбата да критикува и тоа да критикува без аргументи“. Вака реагираше Саш Лазаровски од ОК на ВМРО-ДПМНЕ на прес конференцијата на Јани Макрадули кој кажа дека Зоран Ставрески и пред две години потпишал сличен меморандум во Русија.
„Во овој случај јасни се фактите, се знаат субјектите на изведување, оформена е финансиската конструкција, се преговара за финална изведба на гасификацијата, а СДСМ повторно критикува. Македонија ќе направи крупен исчекор во своето енергетско функционирање и ќе обезбеди сигурен доток на гас за многу години одсега.
Јасно е. Желбата на господинот Макрадули е да искритикува се и по секоја цена.
Сепак, Макрадули треба да се потсети и на единствените крупни капитални проекти на СДСМ, како штедилницата “ТАТ”, како никогаш неизградената пруга до Бугарија, како патот Велес – Прилеп преку Бабуна на кој што во 1994 година Бранко Црвенковски му стави камен темелник и потоа ниту едно камче не помести за да тој се изгради, како 200 000 луѓе избркани од работа.
Е ова се капиталните проекти на СДСМ. За разлика од нив, ВМРО ДПМНЕ има за што да зборува, а граѓаните се тие на крај кој што правилно ќе оценат кој бил во право“, рече Сашо Лазаровски од ВМРО-ДПМНЕ.