Со одлуката за одлагање на британското истапување од ЕУ за шест месеци, избегнато е „страшното сценарио“ за Брегзит без договор, изјави директорката на Меѓународниот монетарен фонд (ММФ), Кристин Лагард.
Таа нагласи дека одлагањето на Брегзит сепак се уште не ги решило сите проблеми меѓу Велика Британија и ЕУ и не ја надминало неизвесноста околу исходот од британското истапување од Унијата, што, според неа, придонело и за забавување на растот на глобалната економија
– Најважно е што Велика Британија нема да излезе од ЕУ на 12 април без договор. Тоа овозможува време за продолжување на разговорите меѓу различните страни во Велика Британија. Тоа веројатно им дава време и на индустријалците и на работниците да се подготват за сите опции, за да се обидат да ја гарантираат својата иднина, изјави синоќа Лагард на прес-конференција на маргините на пролетното заседание на ММФ и Светската банка.
Европските лидери на Самитот во Брисел во средата донесоа одлука за одлагање на Брегзит до 31 октомври, со цел да и се даде време на Велика Британија да ги реши внатрешните несогласувања околу истапувањето од Унијата.
Неизвесноста околу Брегзит најмногу ја погоди самата Велика Британија, пред се британските компании, кои се соочија со пад на инвестициите и намалување на продуктивноста.